Di President of Nigerian Institute of Public Relations, NIPR, Dr. Ike Neliaku, don lead delegation go meet European Union Ambassador to Nigeria and ECOWAS, Amb. Gautier Mignot, as Nigeria dey prepare to host di 2026 World Public Relations Forum, WPRF, for Abuja.
According to information wey NIPR release, di main reason na to ask for European Union support and partnership toward successful hosting for di international public relations gathering.
For di meeting, Neliaku invite Ambassador Mignot to di one-week programme and seek di EU support for di event. Di ambassador accept di invitation and promise say European Union go collaborate with NIPR for successful hosting of di forum.
Di WPRF dey scheduled to take place for Abuja from November 15 to 21, 2026, with di main programme wet go start November 16. Di main venue na Transcorp Hilton, Abuja, while some activities go happen for oda designated locations.
Di forum carry di theme, “Responsible Communication: Di Voice of di World,” and e go bring public relations and communication professionals, policymakers, business leaders, academics, young professionals and oda stakeholders from different parts of di world togeda.
For di organisers, di gadaring go focus on how responsible communication wey go help build trust, support ethical leadership, encourage inclusion, tackle misinformation and contribute for sustainable development. Di organisers too say participants from more dan 126 countries dey expected for di event.
For di meeting with di EU ambassador, members of Neliaku delegation include NIPR Governing Council member, Hajiya Maryam Sanusi; NRMG Board member, Chief Mrs. Moji Makanjuola; NIPR Director of Public Relations, Mr. Stanley Ogadigo; and representative of Young Professionals Hub, Ms. Judith Bernard.
Di planned partnership with European Union dey come as NIPR dey increase diplomatic with institutional engagement ahead of di forum. Di NIPR don already engage oda African and international stakeholders as part of preparation for di Abuja gadaring. Kenya, for example, don confirm participation through em Minister of Information, Communications and Digital Economy, William Kabogo Gitau.
NIPR too don secure media and institutional partnerships for di event. Federal Radio Corporation of Nigeria, FRCN, don become official host radio broadcaster, while Nigerian Television Authority, NTA, don earlier sign agreement to serve as official host broadcast television.
Di forum too go take place alongside di 37th African Public Relations Association, APRA, Conference,wey go make di November gadaring beta platform for discussions around communication and public relations across Africa and beyond.
As Nigeria dey prepare to welcome international delegates, di engagement with di European Union show how organisers dey seek support from international partners ahead of di forum. For NIPR, di wider objective na to use di gadaring to encourage responsible communication and create beta professional connections across different regions.
NIPR President Ike Neliaku don meet EU Ambassador Gautier Mignot to seek European Union support and partnership ahead of di 2026 World Public Relations Forum for Abuja.
![Subscribe to Obaland Magazine](<a href="/advertise"> <img src="https://yourwebsite.com/path-to-ad.jpg" alt="Advertise with us" width="300" height="250"> </a>){kind=link}